അതിഥികൾ

ചില നഷ്ടപ്പെടലുകൾ 

കൃത്യമായ ഇടവേളകളിൽ 

കണ്ണീർ തുള്ളിയായി 

മടങ്ങിയെത്തി

എന്റെ കവിളുകളിൽ 

ചിത്രമെഴുതി കടന്നുപോകുന്നു .

ഇനിയും വരണമെന്നോ 

വരരുതെന്നോ പറയാതെ 

ഞാൻ അവയെ യാത്രയാക്കുന്നു..








 (ചിത്രം ഗൂഗിളില്‍ നിന്ന്)

ചിരിക്കാത്ത ചിത്രം..

കാലം താഴിട്ടുപൂട്ടിയ 
പെട്ടിതന്നുള്ളിൽ 
വായു കിട്ടാതുറങ്ങും 
പൂവിതൾ ,
ലോകം പുകഴ്ത്തിയ 
പൊൻവിരൽ തുമ്പുകൾ 
തെളിനീരിൽ മുക്കി 
വരച്ചൊരു ചിത്രം 
ചുണ്ടു വിടർത്തി 
ചിരിച്ചില്ല പോലും..




  (ചിത്രം ഗൂഗിളില്‍ നിന്ന്)

പകലെവിടെ ?

ഇന്നലെ പകലുണ്ടായിരുന്നോ ?
ഓർമ്മകൾ ചികഞ്ഞിട്ടൊരു 
പല്ലും നഖവും പോലും കിട്ടിയില്ല 
ഇന്നെവിടെയാ നിൽക്കുന്നത് ?
ഒരു കോണിപ്പടിയുടെ അന്ത്യത്തിൽ 
എങ്കിൽ ഇനി താഴോട്ടിറങ്ങാം 
താഴെ എവിടെ ?
അങ്ങനെയൊരു 'താഴെ' ഉണ്ടോ ?
താഴെയും വായു മുകളിലും വായു
 അപ്പോഴതാ  വരുന്നു ഒരു JCB കൈ 
കോണിയോടെ എടുത്ത് 
ഒരു ടിപ്പറിൽ കുടഞ്ഞിട്ടു , പിന്നെ 
ഇന്നലത്തെ പകൽ പോയവഴിയെ 
പ്രയാണവും ആരംഭിച്ചു .. 




  (ചിത്രം ഗൂഗിളില്‍ നിന്ന്)
 

മൂന്നു പാഴ് വിലാപങ്ങൾ

നഖമൊടിഞ്ഞ  സമൂഹം കത്തിയു-
മായെത്തി ആരുടെയോ  മുഖംമൂടുമീ 
കറുത്ത ശീല നേരെയാക്കി,
മടങ്ങുന്ന കാഴ്ച്ച കണ്ടുനിൽക്കാൻ 
പോറൽവീണ ഒരു വാൽക്കണ്ണാടി മാത്രം  
                            ****
താങ്ങുപോയി കഴുത്തൊടിഞ്ഞ ഒരു 
കുടിവാഴ പിണ്ടിയിൽ നിന്നും 
നാരുപിരിച്ചൊരു വടം പണിത 
പൈതൃകം ഇന്നൊരു കറിവേപ്പില 
കരിവണ്ടുമൂളുന്ന രാഗങ്ങളിൽ പലതിലും 
കരിപുരണ്ട വിലാപങ്ങൾ വിരിവെച്ചു 
                            ****
ആഴത്തിൽതുഴയൂന്നി കടവുകൾ താണ്ടുന്ന 
കടത്തുകാരന്റെ വിയർപ്പുകണം 
പുഴയെ കടലിൻ പര്യായമാക്കില്ലൊരിക്കലും 
കന്നിൻ പുറത്തെ പ്രാണി കണക്കെ 
വാലിട്ടടിയിൽ ചുവർച്ചിത്രമാകുമെന്നു മാത്രം 

ചിന്തകൾ ശത്രുക്കൾ

ചിന്തകൾ ചിലനേരം ശത്രുക്കൾ 

ലജ്ജതൻ വഴിയിലെ പരവതാനികൾ 

അവയുടെ കൈത്തിരി നാളങ്ങൾ 

നീളുന്നു പതിതഹൃത്തിൻ ഉള്ളറകളോളം 

നീർക്കുമിളയുടെ ആയുസ്സർഹിച്ച 

കാര്യങ്ങൾ ആയുസ്സൊടുങ്ങും 

കാലങ്ങളിൽ പോലും നീറിപ്പുകക്കും 

ചിന്തകൾ ചിലനേരം ശത്രുക്കൾ .. 




  (ചിത്രം ഗൂഗിളില്‍ നിന്ന്)

സ്വപ്നം

നിലാമഴയിൽ കുളിരിനെ 
തട്ടിമാറ്റി മനസ്സിൽ വീണൊരു കനൽ 
നീറിപുകഞ്ഞൊരു മാന്ത്രിക ലോകത്തെ 
അരികത്തണക്കുന്ന  അത്ഭുത വിദ്യ 
ആരോരുമറിയാതെ മന്ദഹസിക്കുവാൻ 
ആരോരുമറിയാതെ മിഴിനീർവാർക്കുവാൻ 
ഏകാന്ത പഥികനായി വയലേല പുൽകുവാൻ 
ആരോടും പറയാത്ത കഥകൾ ചൊല്ലുവാൻ 
അന്ധകാരത്തിൻറെ  ആഴങ്ങൾ തിരയുവാൻ 
എന്നെന്നും എന്നിൽ വന്നു നിറയുന്ന 
കുളിരുള്ളോരഗ്നി അതാണ്‌ സ്വപ്നം .... 

ലയം

ഒഴുകിയൊഴുകിയൊരു 
അനുഭൂതി തരംഗത്തിൽ  
അതിരുവിട്ടു പറന്നു 
വിഹായസ്സിൽ .. 
വെരുകുപോലലയുന്ന ചിന്തകൾ  
ശംഖിനുള്ളിൽ നിറച്ച് 
ഭാരമെല്ലാംമൊഴിച്ച്  
ചിന്മുദ്രപൂകി .... 





  (ചിത്രം ഗൂഗിളില്‍ നിന്ന്)